Vin Bay Kalinda, Vin Chante, Vin Danse ak 2 Kreyòl Yo
Ann Rakonte Istwa Kreyòl (Haitian Creole Story Time)
Premye dimanch chak mwa, nou envite w vini pou n pataje istwa kout nou deja pibliye yo ak nou. Pwochen rankont lan ap fèt Dimanch, 2 Novanm, 2025 @3 :00-4 :00 nan lapremidi. N ap li, Fesito al nan mache, yon kont Afriken Junior Duplessis trandui an Kreyòl. Imèl nou (scutt.philosophy@gmail.com)epi n ap pataje lyen Zoom lan avèk nou.
Karaoke Kreyòl
Nan lakou 2 Kreyòl Yo se tout lasent jounen mizik ap jwe. Mizik se konsolasyon nou, enspirasyon nou, terapi nou. Gen anpil bèl mizik Kreyòl nou damou. Nou envite w vin aprann chante yo ak nou nan Karaoke Kreyòl. Premye rankont lan ap fèt Dimanch 9 Novanm 3 :00 – 4 :00 nan lapremidi. Imèl nou (scutt.philosophy@gmail.com) epi n ap pataje lyen Zoom lan ak nou.
Danse se Remèd (Remèd Kreyòl)
Nan kilti Afrikèn lan, se tout moun ki chante, tout moun ki danse. Danse se remèd. Nan lakou 2 Kreyòl Yo, menm jan nou pran ti te fèy nou lematen, n ap kreye moman chak jou pou n danse. Nou envite w kiltive danse chak jou ak nou. Imèl nou pou plis detay (scutt.philosophy@gmail.com) epi n a planifye kòman nou ka fè sa ansanm.
Kafe ak Konvèsasyon Kreyòl
Youn nan gwo plezi pou nou nan lakou 2 Kreyòl yo se bwè ti kafe akonpaye ak pen oubyen kasav lematen. Nou envite w vin bwè yon ti kafe ak nou pandan n ap bay kalinda sou tout kalite ti koze ki enterese n. Si w ta anvi fè sa ak nou (menm lè w pa fanatik kafe, w a prepare ti plezi pa w), imèl nou ( scutt.philosophy@gmail.com) pou n planifye sa ansanm sou Zoom.
Atelye Tradiksyon Kreyòl
Youn nan travay nou bay tèt nou nan Edisyon 2 Kreyòl Yo se tradui bèl literati etranje (espesyalman literati moun nwa ekri) nan lang Kreyòl Ayisyèn lan. Se pou sa nou kreye Koleksyon Jaliyaa (https://2kreyolyo.com/koleksyon-jaliyaa/) Si w gen yon pasyon pou tradui bèl zèv literè nan lang Kreyòl Ayisyèn lan, epi si w santi w bezwen plis akonpayman pou w evolye nan domèn lan, nou envite w imèl nou (scutt.philosophy@gmail.com) epi n ap planifye ansanm kèk atelye tradiksyon ki ka dire 30 minit a inèdtan sou Zoom.
Ekri Istwa Pa w la an Kreyòl
Gen yon konviksyon fondamantal ki kore travay nou nan Edisyon 2 Kreyòl Yo: Istwa nou yo, nan vwa pa nou, nan kadans pa nou, nan lang pa nou, gen yon enpòtans kapital pou oryante n nan chimen larefleksyon, transfòmasyon, epi louvri imajinasyon n pou envizaje lòt posibilite, lòt fason, lòt kadans nan jan nou viv, jan n gouye ak Lwa yo, jan n gouye ak Lanati, jan n gouye ak youn lòt, jan n gouye ak lavi epi lanmò. Fè yon ti gade tit nan Koleksyon Istwa Danfans lan (https://2kreyolyo.com/koleksyon-istwa-danfans-2/), nan Koleksyon Moriso Lewa a (https://2kreyolyo.com/koleksyon-moriso-lewa/), ak nan Koleksyon Maji Fèy la ( https://2kreyolyo.com/koleksyon-maji-fey/) pou w gen yon lide sou istwa nou plibiye deja yo. Si w ta renmen istwa pa w la nan lang Kreyòl Ayisyèn lan, nou envite w pèmèt nou akonpaye w. Imèl nou (scutt.philosophy@gmail.com) pou n brase lide sou diferan fason nou ka fè sa.